जिल्ला प्रशासन कार्यालय कास्कीले पोखरा महानगर ६ लेकसाइडस्थित द ओल्ड लान हुआ रेष्टुरेन्ट एन्ड बारलाई दुई लाख रुपैयाँ जरिवाना गरेको छ।
अधिकतम खुद्रा मूल्यभन्दा चौबर बढी मूल्य लिएको पाइएपछि प्रशासनले बुधबार द ओल्ड लानलाई दुई लाख रुपैयाँ जरिवाना गरेको हो।
अधिकतम मूल्यभन्दा बढी मूल्य लिई बिक्री गरी उपभोक्ता संरक्षण ऐन २०७५ को दफा ३८ को खण्ड ८ बमोजिमको कसुर गरेको देखिएकाले सोही ऐनको दफा ३९ को उफदफा १ को खण्ड ख बमोजिम जरिवाना गरिएको प्रशासनले जनाएको छ।
यो कसूर गरे वा गराएमा दुई लाखदेखि तीन लाख जरिवाना गर्न सक्ने प्रावधान छ। यो रेष्टुरेन्टले एक बोतल प्रशोधित पानीलाई एक सय रुपियाँमा बिक्री गरेको बिलसहित उजुरी परेको थियो।
उजुरीपछि छानबिन गर्दा बढी मूल्य लिएको पाइएपछि कारवाही स्वरुप जरिवाना गर्दै कम्पनीले तोकेको अधिकतम मूल्यभन्दा बढी मूल्यमा सामाग्री बिक्री नगर्न निर्देशन दिइएको कास्कीका सहायक प्रमुख जिल्ला अधिकारी शिव लम्सालले जानकारी दिनुभयो। उहाँले प्रचलित ऐन, कानुन पालना गर्दै व्यापार, व्यवसाय गर्न र उपभोक्ताको हितलाई ख्याल गर्नसमेत आग्रह गर्नुभएको छ।
कास्की प्रशासनले शनिबार पोखराको चिप्लेढुङ्गाको मारवाडी सेवा भोजनालयलाई खाजाको प्याकेटमा मूल्य अनुसार कम परिमाण रहेको पाइएपछि दुई लाख जरिवाना गरेको थियो।
